Rəbb Allahım,
içimdə məskən salmağına layiq deyiləm, çünki o xarab və dağılmış
vəziyyətdədir. Sən orda Başını qoymağa yer tapmazsan. Ancaq məhz bizim
üçün Özünü alçaltdın və mənim qanunsuzluğumun ölçüsünü təslim aldın. Bir
tövlədə doğulmağı qəbul etdiyin kimi, indi də ruhumun və bədənimin
tövləsinə gəl. Axşam yeməyi yemək məqsədi ilə cüzamlı Simonun evinə
girməyi əskiklik kimi görmədin, mənim düşgün ruhumun evinə də girməyi
əskiklik bilmə, çünki mən də günahkar və cüzamlı biriyəm. Sən natəmiz
olan, amma Sənə toxunmaq üçün yaxınlaşmaq istəyən qadını rədd etmədiyin
kimi, Sənə yaxınlaşıb toxunmaq istəyən mən günahkara da rəhm elə. Rəbbim
və Padşahım, Sənin müqəddəs bədəninin və qiymətli qanının yandırıcı
atəşi mənim ruhumu və bədənimi təmizləsin, aydınlatsın və gücləndirsin.
Eyni zamanda mənim çoxsaylı günahlarımın yükü üçün kömək, bütün şeytani
təsirlərdən müdafiə, günahkar vərdişlərimi yox edən amil, Sənin
əmrlərinə tabe olmağa köməkçi, kölgəndə böyümə və Padşahlığın üçün
bacarıq səbəbi olsun.
Ey Məsih Allahım, Sənə gəlirəm, həyasızlıqla
yox, ancaq Sənin mehriban yaxşılığından güc almaq üçün, çünki Sənin
müqəddəs süfrəndən uzun müddət ayrı qaldığım üçün düşmənə ov oldum.
Amma, ey müqəddəs olan Rəbbim - Sənə yalvarıram, ruhuma, bədənimə,
düşüncəmə, ürəyimə, hisslərimə xeyir-dua ver. Məni tamamilə yenilə,
içimdə müqəddəs qorxunu ək və qəlbimi müqəddəsliyinlə möhürlə. Mənim
köməkçim və qoruyucum ol, həyatımı sülhlə yönləndir, Sənin izzətinin
sağında müqəddəslərinlə birlikdə dayanmağa məni layiq gör. Bütün bunları
Sənin ləkəsiz Anan, Səmavi güclər və bütün Müqəddəslərinin duaları ilə
diləyirəm. AMİN
|